ଭୁବନେଶ୍ଵର, ୧୭/୦୯ : ପିଏମ୍ ଆବାସ ହିତାଧିକାରୀଙ୍କ ଘରେ କ୍ଷୀରି ଖାଇଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଗାଡ଼କଣ ଶବର ସାହିର ଆବାସ ହିତାଧିକାରୀ ଅନ୍ତର୍ଯ୍ୟାମୀ ନାୟକଙ୍କ ଘରେ ପ୍ରସ୍ତୁତ ହୋଇଥିବା କ୍ଷୀରି ଖାଇଛନ୍ତି। କ୍ଷୀରି ଭଲ ହୋଇଥିବା କଥା ମୋଦି କହିଛନ୍ତି। 

ସୁଭଦ୍ରା ଶୁଭାରମ୍ଭ ଅବସରରେ ପ୍ରଧାନମନ୍ତ୍ରୀ ତାଙ୍କ ବକ୍ତବ୍ୟରେ ଗାଡ଼କଣରେ କ୍ଷୀରି ଖାଇବା କଥା କହିଥିଲେ। ମୋଦି କହିଥିଲେ ଯେ, ଏଠାକୁ ଆସିବା ପୂର୍ବରୁ ଆବାସ ଗୃହ ପ୍ରବେଶ କରାଇବାକୁ ମୁଁ ଏକ ଆଦିବାସୀ ପରିବାରକୁ ଯାଇଥିଲି। ସେଠାରେ ଜଣେ ଆଦିବାସୀ ମା ମୋତେ କ୍ଷୀରି ଖାଇବାକୁ ଦେଇଥିଲେ। କ୍ଷୀରି ଖାଇବା ବେଳେ ମୋ ମା କଥା ମନେ ପଡ଼ିଲା। ମୁଁ କିଛି କରିବାକୁ ଯିବା ବେଳେ ମା ମିଠା ଖୁଆଉଥିଲା। 

ସୂଚନାନୁଯାୟୀ, ଓଡ଼ିଶା ଗସ୍ତରେ ଆସି ଭୁବନେଶ୍ଵର ଗାଡ଼କଣରେ ଥିବା ଆବାସ ହିତାଧିକାରୀଙ୍କୁ ଭେଟିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏହି ଅବସରରେ ସେ ପିଏମ୍ ଆବାସ ଯୋଜନାର ହିତାଧିକାରୀ ଅନ୍ତର୍ଯ୍ୟାମୀ ନାୟକଙ୍କ ଘରକୁ ଯାଇଥିଲେ। ତାଙ୍କ ସହ ମୁଖ୍ୟମନ୍ତ୍ରୀ ମୋହନ ମାଝୀ ଉପସ୍ଥିତ ଥିଲେ। ମୁଖ୍ୟମନ୍ତ୍ରୀ ମଧ୍ୟ ହିତାଧିକାରୀଙ୍କ ଘରେ କ୍ଷୀରି ଖାଇଥିଲେ। ମୋଦି କିଛି ସମୟ ପାଇଁ ଅନ୍ତର୍ଯ୍ୟାମୀଙ୍କ ଘର ଲୋକଙ୍କ ସହ ଆଲୋଚନା କରିଥିଲେ। ସେଠାରେ ପୂଜାର୍ଚ୍ଚନା କରିଥିଲେ।